Teeçx yace seena itxiçxa pekujukh kwe´sx kiwesu, txa a nxafx nasa pal yacekwe. Naa piçkwes a çxapuç a´te sutx nuy vitun kaj, nasawesx yuwes seena ju´wu yu pa´ka.

Palkwe, pahz kse´ba teeçx a´kafx ji´pçxakh vitun kaj, nasawesx khphakheçxa mjin yunxisku jweteçxa nuy çxhaçxha wajas yahtxna usu.

Nasa paala nasawexyakh puutx mjin usgajas yath txajkh. Naa yathkwe, açxj pajwa usçxa´ naa yath mjiwa yuwe kaapyajwa, kwêe, vxite luuçkwewesxyakh jxinxi dxi´j txikhnxi ûsa´.

Txajx mjinxis a´kafx isatx yatxi, wejxkwe yatxsayu kwêewesxta, txaawesxa mjisu, khphakhenxisutx, naa nasa pal yuwetx jxtxuden fxi´ze.

Kwêe yuwete mjin yusa, Fabian Dagua teeçx khphakhe ente nawku thuthen kaj:

“Ez a´te takheçsu setx entekh upxnakahj, teeçx çjiç yatkwe khwenxa çxha´bte sa´th tama kiwete. Leçxkwejuy piyawah yuwesku seena wedxh, piyanxi yathna uçxjawa danajuçxakh kuyna txisi, txajx thê´sawesxa leeçxkwetey piya yatte akhya ajameta vxu jiph mee pa´ka. Kse´ba teeçx a´kafx jiphçxakh piyaya takh. Leçxkwe juytxi uyna kahj dxus yuwes wedxna uhj pa´ka, kuhj a´kafx skhewnxiju puuçxhwasa uyku´, ez a´te takheçsu kse´ba ente çxha´b çxijmete pal jxinxi yuwes ka´bakh khiçxa nxafx lxisas 

Wewna uste´, kwêe dawa ta´sxçxa na´jikh, nasa palkwe kuhj çxha´bsukh dxus yuwes jxtxhuden usu.

“Txajx fxi´zenxis khphakhe isa thaw thutheje, txaapaka kwêewesxa txajx ujunxis jxithaw, nasa pal yuwes itxiçxathaw jxpe´je”, txawku kwêe dawa we´we.

Ki´ nasa pal yuwete we´weçte, naa the´ja seena jxthuthe yu´kh nasawesx kiwesu txaw yaçte kasejçxa paatxhikhna unhj pa´ka ptxunxi, kiwe kusa´nxhi yuwes nasawesx jhu´gu yuçxa txisxin.

“Txa´sa nxafx putx we´wnxi yuwe takhne´ta, kwe´sx yath wala tewe´sxas, txa´te nee usuhj, txa´kaçx ensu´ seena yuwe theysa usu´ne, txa´kaçxsu musxkawe´sxa çaam atuu petxjxi çxahne´ta jiphsayu kjin uma kiwe nwew wahj yuwes jxhpesatxa neuya nenta ta´kh”, txajxikh kaapiya´sa Nixon Yathkwe.

Yathkwe ki´ phjuseçxa na´jhikh “txajx piyanxi yuweyakha nasatx seena nxutxpe´j kahjkh peena yujwa musxkatx we´sekhamen kjin nasa naw mjiya takh kaanj”.

Txa´wyuçxakh nasa palkwe jxçxhaçxha pu´çx nasawesxtxis, kiwatx ku´sa´jxa musxka wesx kusete ussatx.

“Kwe´sxyakh itxi ussa txa´jx fxi´zenxisa. Çxha çxha usnxi kwe´sx yakha seena ewsa jhekhe kaapianj ujwa khin kwe´sx khphakheçxa mjin yunxis txa´z ajsuy khçxa çxha jhwa”, jikh yaçkhey kwêe yuwes mjin yu´sa, Jorge Palomino.

Kwêe Dawa nasa pal fxi´zenxis thuthen usçxa´, txajx ikhnxi yuwesku jxtxu´de: “Khe´b ente çxapuç a´tete, çaam atu´ nasawesx kiwate (Lopez Adentro), seenu tahz kse´ba nwesxkwe yathtxitx khakh kjin tulkweswa jxuka´tx suwna kahj. Txa´wyu Pa´ka nasa palkwe seena ûsxaçxakh. Kuus kus khe, kuusi nawen khphakhenxi yath (Santa Ines) kliçxaw çxha´bte, je´z piçkwe ji´ba çaamte u´jsa ûpa pane´ta ikh un´ph”.

Açxh pa´jwa nasa palkwes ya yatxi´kh, txa´jx yuwe txhikhnxis txa´zi piakhnaw mjin uhjwa. Kwêe wesxtxisa´ mjiçxakh neeyu pal yuwes txuhnden, kjin txa´jisçxame vxite nasa nwesxkwewa txa yuwe pa´ka skhewneta txa´wesxjiswa txuhnden uska´j.

Çxha´b wala kiwe tewesxa nawtxi we´w paalas “dxi´jas txi´khçxa fxi´zesa wêth wêth yuwe tewe´sxas” khin nasath luuçxthu jiçxa thamemekh we´we. Txa´jx fxiçxha txikhnxisa, piyanxi, khphakhenxi yatsutx kaa phthuse´je.